تھران (ویب ڈیسک) ایرانی وزیر خارجہ سید عباس عراقچی نے کہا ہے کہ ایٹمی افزودگی ایران کا قانونی حق ہے۔ انہوں نے واضح کیا کہ ایران این پی ٹی کے رکن ہونے کے ناطے پرامن مقاصد کے لیے ایٹمی توانائی بشمول افزودگی سے فائدہ اٹھانے کا مکمل حق رکھتا ہے۔
عراقچی نے مزید کہا کہ امریکہ کی ٹیم ایران کے موقف سے بخوبی آگاہ ہے اور ایران بھی امریکی موقف سے واقف ہے۔ انہوں نے کہا کہ دونوں جانب پہلے ہی اپنے خدشات کا تبادلہ ہو چکا ہے۔
وزیر خارجہ نے اسرائیل کے ساتھ حالیہ تنازع کے بارے میں کہا کہ "ہاں، ہمارے ہوائی دفاع میں کچھ مسائل تھے، لیکن اسرائیل کے بھی اپنے ہوائی دفاع میں کمزوریاں تھیں۔ ہمارے میزائل اسرائیل کے اندر اہداف تک پہنچنے میں کامیاب رہے۔”
عراقچی نے کہا کہ "اسرائیل نے جنگ کا آغاز کیا، لیکن 12 دن کے بعد غیر مشروط جنگ بندی کے لیے درخواست دینا پڑی۔ اس کی وجہ یہ تھی کہ وہ ہماری میزائلوں کے خلاف اپنے دفاع میں ناکام رہے۔”