نیویارک: نائب وزیراعظم و وزیر خارجہ سینیٹر محمد اسحاق ڈار نے اقوام متحدہ کی جنرل اسمبلی کے 81ویں اجلاس کے موقع پر نیپال، جرمنی اور جنوبی کوریا کے وزرائے خارجہ سے الگ الگ ملاقاتیں کیں۔
نیپال کے وزیر خارجہ ششیر خانال سے ملاقات میں اسحاق ڈار نے حالیہ اچانک آنے والے سیلاب کے نتیجے میں ہونے والے جانی نقصان اور تباہی پر اظہار تعزیت کیا۔ انہوں نے کہا کہ مشکل وقت میں پاکستان نیپال کے عوام کے ساتھ کھڑا ہے۔
نیپالی وزیر خارجہ نے پاکستان کی حمایت پر اظہار تشکر کیا اور اسحاق ڈار کو قدرتی آفت کی شدت، انسانی نقصانات اور بنیادی ڈھانچے کو پہنچنے والے نقصان سے آگاہ کیا۔
دونوں رہنماؤں نے دوطرفہ تعلقات کا جائزہ لیا اور سیاسی و اقتصادی مشاورتی نظام کے ذریعے تعاون مزید بڑھانے کے طریقوں پر تبادلہ خیال کیا۔ دونوں جانب سے اقوام متحدہ اور جنوبی ایشیائی علاقائی تعاون تنظیم سمیت کثیرالجہتی فورمز پر رابطہ اور تعاون جاری رکھنے کی اہمیت پر زور دیا گیا۔
جرمنی کے وزیر خارجہ یوہان وادے فول سے ملاقات میں دونوں وزرائے خارجہ نے پاکستان اور جرمنی کے درمیان سفارتی تعلقات کے قیام کی 75ویں سالگرہ پر ایک دوسرے کو مبارکباد دی۔
ملاقات میں تجارت، سرمایہ کاری، اقتصادی روابط اور کاروباری شعبے کے درمیان روابط بڑھانے سمیت دوطرفہ تعاون کے مختلف پہلوؤں پر تبادلہ خیال کیا گیا۔ دونوں وزرائے خارجہ نے دفاع، تعلیم، ہنرمند افرادی قوت اور عوامی روابط کے شعبوں میں تعاون بڑھانے پر بھی اتفاق کیا۔
جرمن وزیر خارجہ نے علاقائی امن و استحکام کے فروغ کیلئے مذاکرات اور سفارت کاری کے ذریعے پاکستان کے تعمیری کردار کو سراہا۔ دونوں رہنماؤں نے فلسطین کی صورتحال پر بھی تبادلہ خیال کیا، جبکہ اسحاق ڈار نے جنگ بندی، انسانی امداد کی فراہمی اور دو ریاستی حل کی بنیاد پر منصفانہ اور دیرپا حل کیلئے عالمی کوششیں جاری رکھنے کی اہمیت پر زور دیا۔
جنوبی کوریا کے وزیر خارجہ چو ہیون سے ملاقات میں اسحاق ڈار نے دوطرفہ تعلقات کا جائزہ لیا اور تجارت، سرمایہ کاری اور اقتصادی شعبوں میں تعاون مزید مضبوط بنانے کے طریقوں پر گفتگو کی۔
نائب وزیراعظم نے نئے مواقع پیدا کرنے کیلئے پاکستان اور جنوبی کوریا کے کاروباری شعبوں کے درمیان روابط بڑھانے کی اہمیت پر زور دیا۔ جنوبی کوریا کے وزیر خارجہ نے علاقائی مسائل کے حل کیلئے مذاکرات اور سفارت کاری کے فروغ میں پاکستان کے تعمیری کردار کو سراہا۔
دونوں وزرائے خارجہ نے کثیرالجہتی نظام کی اہمیت کو اجاگر کرتے ہوئے اقوام متحدہ اور دیگر کثیرالجہتی فورمز پر باہمی دلچسپی کے امور پر تعاون جاری رکھنے کے عزم کا اعادہ کیا۔
تینوں ملاقاتوں میں فریقین نے قریبی رابطہ برقرار رکھنے اور دوطرفہ تعاون کو مزید وسعت دینے پر اتفاق کیا۔