اسلام آباد: ایران کی حکومت کے مطابق ایران اور امریکہ کے درمیان براہِ راست مذاکرات کا تیسرا دور، جو پاکستان کی ثالثی میں اسلام آباد میں منعقد ہوا، مکمل ہو گیا ہے۔
تازہ ترین دور کے اختتام کے بعد دونوں فریقین کی ماہر ٹیموں نے مذاکراتی عمل کے حصے کے طور پر تحریری مسودوں کا تبادلہ جاری رکھا۔
ایرانی میڈیا رپورٹس کے مطابق یہ مذاکرات مقامی وقت کے مطابق صبح 3:12 بجے (2212 GMT) پر ختم ہوئے۔
ذرائع نے بتایا کہ ایرانی اور امریکی وفود کے درمیان سنگین اختلافات اب بھی حل طلب ہیں۔
رپورٹس میں کہا گیا ہے کہ پیش رفت اس بات پر منحصر ہے کہ آیا امریکہ اپنے “زیادہ سے زیادہ مطالبات پر مبنی رویے” سے ہٹ کر زیادہ حقیقت پسندانہ مؤقف اختیار کرتا ہے یا نہیں۔
ایران، امریکہ اور پاکستان کے درمیان سہ فریقی مذاکرات کا تیسرا دور ہفتے کی رات اسلام آباد میں رات گئے دوبارہ شروع ہوا، پاکستانی حکومتی ذرائع کے مطابق یہ اجلاس ڈنر بریک کے بعد تقریباً آدھی رات کے قریب دوبارہ شروع ہوا۔
مذاکرات کو اس وقت بھی جاری قرار دیا گیا تھا، اور توقع ظاہر کی جا رہی تھی کہ بات چیت دوسرے دن تک بھی جاری رہ سکتی ہے۔
اس سے قبل دونوں فریقین نے ابتدائی طور پر بالواسطہ مذاکرات کیے، اس کے بعد آمنے سامنے مذاکرات ہوئے، جبکہ تحریری دستاویزات کا تبادلہ بھی کیا گیا، جس سے محتاط پیش رفت کے اشارے ملے۔
امریکی وفد کی قیادت نائب صدر جے ڈی وینس کر رہے ہیں، جبکہ ان کے ہمراہ خصوصی نمائندہ اسٹیو وٹکوف اور سینئر مشیر جیرڈ کشنر شامل ہیں۔
ایرانی وفد کی قیادت پارلیمنٹ کے اسپیکر محمد باقر قالیباف کر رہے ہیں، جبکہ وزیر خارجہ عباس عراقچی اور سینئر سکیورٹی عہدیدار علی باقری کنی بھی اس عمل میں شریک ہیں۔
سینئر پاکستانی حکام نے ان مذاکرات میں سہولت کاری کی، جس کے ذریعے اسلام آباد کو اس عمل میں ایک اہم ثالث کے طور پر پیش کیا گیا۔
ایرانی میڈیا کے مطابق یہ مذاکرات “حساس مرحلے” میں داخل ہو چکے ہیں، جہاں ماہر ٹیمیں خصوصی کمیٹیوں کے ذریعے تکنیکی سطح پر مصروف ہیں۔
ایرانی وفد کے قریبی ذرائع نے دونوں فریقین کے درمیان مسلسل اختلافات کی نشاندہی کی ہے۔
پاکستان ان مذاکرات کی میزبانی اس وسیع علاقائی تنازع کے خاتمے کی کوششوں کے تحت کر رہا ہے، جو حال ہی میں طے پانے والی نازک دو ہفتے کی جنگ بندی کے تناظر میں ہو رہی ہیں۔