ٹیکساس (خصوصی رپورٹ) ٹیکساس کی سیاست میں ایک تاریخی موڑ اس وقت سامنے آیا جب ڈاکٹر سلیمان لالانی نے ایک مسلمان اور پاکستانی نژاد امریکی کی حیثیت سے ٹیکساس ایوان نمائندگان میں اپنی نمائندگی قائم کی۔
ایک خصوصی انٹرویو میں ڈاکٹر سلیمان لالانی نے بتایا کہ بطور ڈاکٹر اپنے طویل طبی کیریئر کے دوران وہ روزانہ ایسے مریضوں سے ملتے رہے جو صرف بیماریوں ہی نہیں بلکہ ناقص پالیسیوں، مہنگے علاج، اور سماجی عدم مساوات کا بھی شکار تھے۔
یہی مشاہدات ان کے لیے سیاست میں آنے کی بنیادی وجہ بنے، کیونکہ ان کے مطابق مسائل کی جڑ قانون سازی میں اصلاح کے بغیر ختم نہیں ہو سکتی۔
ڈاکٹر سلیمان لالانی نے بتایا کہ بطور ریاستی رکنِ اسمبلی ان کے 2 مسلسل ادوار رہے، جن میں ہر دورانیہ 2 سال پر مشتمل تھا۔ ان ادوار کے دوران انہوں نے درجنوں بلز پیش کیے، جن میں صحتِ عامہ، ذہنی صحت، تعلیمی اصلاحات، کمیونٹی سیفٹی، اور اقلیتی حقوق جیسے موضوعات شامل تھے۔
ان میں سے متعدد بلز قانون کی شکل اختیار کر چکے ہیں، جو ٹیکساس میں عوامی فلاح کے لیے اہم پیش رفت سمجھے جاتے ہیں۔
آئندہ انتخابات میں دوبارہ بطور اسٹیٹ ریپریزنٹیٹو حصہ لینے کے سوال پر ڈاکٹر لالانی نے کہا کہ ان کا منشور صحت کی سہولیات تک مساوی رسائی، معیاری اور جامع تعلیم، شہری آزادیوں کا تحفظ، اور شفاف جمہوری نظام کے فروغ پر مرکوز ہے۔
ان کے مطابق ٹیکساس جیسے بڑے اور متنوع ریاست میں ایسی قانون سازی ناگزیر ہے جو ہر طبقے کو یکساں مواقع فراہم کرے۔
کمیونٹی کے لیے اپنے کردار پر بات کرتے ہوئے ڈاکٹر لالانی نے نوجوانوں میں سیاسی شعور بیدار کرنے، ووٹنگ کی اہمیت اجاگر کرنے، اور امیگرنٹ کمیونٹیز کو مرکزی دھارے کی سیاست سے جوڑنے کی کوششوں کو نمایاں قرار دیا۔
وہ مختلف عوامی نشستوں، تعلیمی پروگرامز، اور کمیونٹی فورمز کے ذریعے نئی نسل کو جمہوری عمل میں حصہ لینے کی ترغیب دیتے رہے ہیں۔
مسلمانوں اور پاکستانی نژاد امریکیوں کی نمائندگی کی اہمیت پر گفتگو کرتے ہوئے ڈاکٹر سلیمان لالانی کا کہنا تھا کہ جب تک اقلیتوں کی اپنی آواز ایوانوں میں موجود نہیں ہوگی، ان کے مسائل اکثر نظرانداز ہوتے رہیں گے۔
ان کے مطابق مقامی، ریاستی، اور وفاقی سطح پر نمائندگی نہ صرف کمیونٹی کے اعتماد کو مضبوط کرتی ہے بلکہ امریکی جمہوریت کو بھی مزید جامع اور مضبوط بناتی ہے۔
ڈاکٹر سلیمان لالانی کا سفر ایک پاکستانی ڈاکٹر سے ٹیکساس کے قانون ساز تک، اس بات کی علامت ہے کہ امریکہ میں جمہوریت مختلف ثقافتوں اور پس منظر رکھنے والے افراد کے لیے مواقع فراہم کر سکتی ہے۔
ان کی جدوجہد اور قانون سازی آنے والی نسلوں کے لیے سیاسی شمولیت اور نمائندگی کی ایک مضبوط مثال بن چکی ہے۔
