ماسکو / کیف: روسی مسلح افواج نے یوکرین کے مختلف علاقوں میں لاجسٹکس مراکز، بندرگاہوں کی تنصیبات اور فوجی سامان کی ترسیل کے لیے استعمال ہونے والے مال بردار بحری جہازوں کو رات گئے ڈرون حملوں میں نشانہ بنانے کا دعویٰ کیا ہے۔
روسی وزارتِ دفاع کے مطابق کارروائیوں میں یوکرینی فوج کے لیے فوجی اور دوہرے استعمال کا سامان ذخیرہ کرنے اور منتقل کرنے والی اہم تنصیبات کو نشانہ بنایا گیا۔
روسی حکام نے دعویٰ کیا کہ یوکرین کے شہر خمیلنیتسکی میں واقع گرینڈ امپورٹ لاجسٹکس مرکز پر حملہ کیا گیا، جہاں یوکرینی فوج کے لیے مختص فوجی اور دوہرے استعمال کا سامان ذخیرہ کیا جاتا تھا۔
بیان کے مطابق وولین خطے کے شہر کوویل میں وینڈر ٹرانس سروس کمپنی کے ٹرانسپورٹ اور لاجسٹکس مرکز کو بھی نشانہ بنایا گیا۔ روسی وزارتِ دفاع کا کہنا ہے کہ یہ مرکز یوکرینی فوج کے لیے سامان اور دیگر ضروری وسائل ذخیرہ کرنے اور تقسیم کرنے کے لیے استعمال ہوتا تھا۔
روسی وزارتِ دفاع نے مزید دعویٰ کیا کہ رینی بندرگاہ پر تین مال بردار بحری جہازوں کو نشانہ بنایا گیا، جو یوکرینی فوج کے لیے فوجی اور دوہرے استعمال کا سامان لے جا رہے تھے۔
کارروائی کے دوران بندرگاہ پر سامان لادنے اور اتارنے والی تنصیبات بھی نشانے پر رہیں۔
روسی حکام کے مطابق بحیرہ اسود میں اوڈیسا کی بندرگاہ کی جانب جانے والے ایک اور مال بردار بحری جہاز پر بھی حملہ کیا گیا، جس کے بارے میں دعویٰ کیا گیا کہ وہ یوکرین کے لیے فوجی سامان لے جا رہا تھا۔
دوسری جانب یوکرین کی ریاستی ایمرجنسی سروس نے بتایا کہ کیف کے علاقے میں ایک صنعتی گودام کو نقصان پہنچا اور حملے کے بعد وہاں آگ بھڑک اٹھی، جس پر امدادی کارکنوں نے قابو پا لیا۔
لیوو کے گورنر میکسم کوزیتسکی کے مطابق علاقے میں توانائی کے بنیادی ڈھانچے کی ایک اہم تنصیب دو دھماکوں کے نتیجے میں متاثر ہوئی۔ ترنوپل کی فوجی انتظامیہ کے سربراہ تاراس پاستوخ نے بھی علاقے میں توانائی کی تین تنصیبات کو نقصان پہنچنے کی اطلاع دی۔
اوڈیسا کی علاقائی فوجی انتظامیہ کے سربراہ اولیگ کیپر نے توانائی کی تنصیبات کو نقصان پہنچنے کی تصدیق کی، تاہم نقصانات کی مزید تفصیلات فراہم نہیں کیں۔
روسی وزارتِ دفاع نے ان حملوں کو یوکرینی فوج کے لیے سامان کی ترسیل اور ذخیرہ کرنے کے نظام کے خلاف کارروائی قرار دیا ہے، جبکہ یوکرینی حکام نے مختلف علاقوں میں صنعتی اور توانائی کی تنصیبات کو پہنچنے والے نقصانات کی اطلاع دی ہے۔