کراچی: ایم کیو ایم پاکستان کی سانحہ گل پلازہ کی تحقیقات کے لیے قائم جوڈیشل کمیشن میں فریق بننے کی درخواست کمیشن نے مسترد کر دی۔
پیر کو جوڈیشل کمیشن کی سماعت کے موقع پر ایم کیو ایم کے رہنما فاروق ستار، نسرین جلیل اور دیگر لیگل ٹیم کے ہمراہ پہنچے۔ ڈاکٹر فاروق ستار نے کمیشن کے سربراہ سے استدعا کی کہ جماعت اس کمیشن میں فریق بننا چاہتی ہے۔
جسٹس آغا فیصل نے کہا کہ کمیشن کی کارروائی پہلے ہی شروع ہو چکی ہے، اس وقت فریق بننے کی اجازت نہیں دی جا سکتی۔ انہوں نے کہا کہ ایم کیو ایم صحیح طریقے سے درخواست دائر کرے، جس پر وکیل طارق منصور نے بتایا کہ درخواست پہلے ہی دائر کی جا چکی ہے، لیکن جسٹس آغا فیصل نے کہا کہ اس وقت اس پر کچھ کارروائی نہیں ہو سکتی۔
فاروق ستار نے بعد ازاں کہا کہ جماعت کے پاس مجرمانہ غفلت، اختیارات کے ناجائز استعمال اور عمارت کی تعمیر میں بے ضابطگیوں کے شواہد موجود ہیں۔ ان کا کہنا تھا کہ ایم کیو ایم عدالتی کمیشن کی معاونت کے لیے حاضر ہوئی ہے اور مضبوط شواہد کے ساتھ فریق بن سکتی ہے۔ انہوں نے مزید کہا کہ کمیشن میں دی گئی پٹیشن انصاف کے تقاضوں کے مطابق نہیں مانی گئی اور تفصیلی پریس کانفرنس بعد میں کی جائے گی۔
ایس ایس پی ٹریفک Ijaz Sheikh نے کمیشن کو بتایا کہ تحقیقات کے دوران بچوں کو طلب کیا گیا اور بیانات قلمبند کیے گئے، جنہوں نے اعتراف کیا کہ آگ ماچس سے کھیلنے کے دوران لگی۔ انہوں نے کہا کہ جائے وقوعہ پر آگ بڑی شدت سے لگی ہوئی تھی اور تینوں سائیڈز پر پولیس کی نفری تعینات تھی، تاہم آگ تیزی سے پھیل گئی۔
اعجاز شیخ نے بتایا کہ آگ لگنے کی وجہ بچوں کا ماچس سے کھیلنا اور عمارت میں موجود آگ پکڑنے والی اشیا، جیسے بلینکٹ، کپڑے، پھول، ٹشو اور اسپرے وغیرہ، تھیں۔ انہوں نے کہا کہ پلازہ کے 17 دروازوں میں سے صرف 4 کھلے تھے، اور دروازے کھولنے کی ذمہ داری ایسوسی ایشن کی تھی، جو چوکیداروں کے ذریعے انتظامات کرتی ہے۔
ایس ایس پی نے کہا کہ ان کا کام ریسکیو ٹیم کے راستے میں خلل نہ ڈالنا تھا اور لوگوں کی وجہ سے ریسکیو کے کام میں کوئی مسئلہ نہیں آیا۔ انہوں نے بتایا کہ ایک ماہ پہلے گرین لائن کا کام شروع ہوا تھا اور گل پلازہ کے اطراف کی سڑکیں محدود چوڑائی کی ہیں۔
جوڈیشل کمیشن نے کارروائی کو بعد میں 25 فروری تک ملتوی کر دیا۔