کیلیفورنیا: واٹس ایپ نے آئی فون صارفین کے لیے شیڈولڈ میسجنگ فیچر کی آزمائش شروع کر دی ہے، جس کے ذریعے صارفین اپنے پیغامات پہلے سے تیار کرکے مقررہ تاریخ اور وقت پر خودکار طور پر بھیج سکیں گے۔
ٹیکنالوجی ویب سائٹ ڈبلیو اے بیٹا انفو کے مطابق یہ فیچر فی الحال منتخب آئی او ایس اور اینڈرائیڈ بیٹا ٹیسٹرز کے لیے دستیاب ہے۔ تاہم، واٹس ایپ نے ابھی تک اس فیچر کے باضابطہ اجرا کی تاریخ کا اعلان نہیں کیا۔
رپورٹ کے مطابق نئے فیچر کے ذریعے صارفین ٹیکسٹ پیغامات کے علاوہ تصاویر، ویڈیوز اور ویب لنکس بھیجنے کے لیے شیڈول کر سکیں گے۔ اس مقصد کے لیے پیغام بھیجنے کی تاریخ اور وقت کا انتخاب کرنا ہوگا، جس کے بعد واٹس ایپ مقررہ وقت پر پیغام خودکار طور پر بھیج دے گا۔
دستیاب معلومات کے مطابق صارفین پیغامات 10 منٹ سے لے کر دو ہفتے تک کے لیے شیڈول کر سکیں گے۔
واٹس ایپ کا یہ نیا فیچر ان صارفین کے لیے خاص طور پر مفید ثابت ہو سکتا ہے جو سالگرہ کی مبارک باد، یاددہانی، کاروباری پیغامات یا اہم معلومات مقررہ وقت پر بھیجنا چاہتے ہیں۔
تاہم، فی الحال یہ سہولت محدود بیٹا ٹیسٹرز تک دستیاب ہے۔ عام صارفین کے لیے اس کے اجرا اور دستیابی سے متعلق واٹس ایپ کی جانب سے باضابطہ اعلان سامنے نہیں آیا۔
فیچر کی آزمائش مکمل ہونے اور کمپنی کی منظوری کے بعد ہی یہ واضح ہوگا کہ اسے تمام صارفین کے لیے کب متعارف کرایا جائے گا۔